بنوں میں حساس اطلاعات پر آپریشن، بھارتی اسپانسرڈ خوارج کے 22 دہشت گرد ہلاک

بنوں — خیبر پختونخوا کے ضلع بنوں میں سیکیورٹی فورسز نے انٹیلی جنس بنیادوں پر کامیاب کارروائی کرتے ہوئے بھارتی اسپانسرڈ فتنۃ الخوارج کے 22 دہشت گردوں کو ہلاک کر دیا۔

یہ آپریشن پیر کے روز خفیہ اطلاعات کی روشنی میں کیا گیا، جس میں بتایا گیا تھا کہ کالعدم ٹی ٹی پی سے منسلک خوارج علاقے میں موجود ہیں۔

آئی ایس پی آر کے مطابق سیکیورٹی فورسز نے دہشت گردوں کے ٹھکانے پر مؤثر حملہ کیا، جس کے دوران شدید فائرنگ کا تبادلہ ہوا اور 22 دہشت گرد مارے گئے۔ علاقے میں مزید خطرات کے خاتمے کے لیے کلیئرنس آپریشن جاری ہے۔

فوج کے مطابق ملک میں جاری دہشت گردی کے خلاف مہم عزمِ استحکام کے تحت پوری شدت کے ساتھ جاری رہے گی تاکہ غیر ملکی سرپرستی یافتہ دہشت گردی کا مکمل خاتمہ کیا جا سکے۔

یہ بھی پڑھیں : بنوں میں بڑے آپریشنز، 17 دہشتگرد ہلاک، سیکیورٹی فورسز کی بڑی کامیابی

وزیر اعظم شہباز شریف نے فورسز کی کامیاب کارروائی کو سراہتے ہوئے کہا کہ مسلح افواج دہشت گردی کے خلاف اہم کامیابیاں حاصل کر رہی ہیں۔ انہوں نے کہا کہ پوری قوم پاک فوج کے ساتھ کھڑی ہے اور دہشت گردی کے مکمل خاتمے کے لیے پرعزم ہے۔

واضح رہے کہ نومبر 2022 میں کالعدم ٹی ٹی پی کی جانب سے جنگ بندی ختم کیے جانے کے بعد خیبر پختونخوا اور بلوچستان میں دہشت گردی کے واقعات میں نمایاں اضافہ ہوا ہے۔